La Culturella

L'uniun

L’Uniun La Culturella ei vegnida fundada ils 17 da mars 2023. Ella ei naschida ord La Culturella fundada 2011 ed il Forum intercultural Mustér fundaus 1999.

L’Uniun Forum cultural internaziunal Disentis/Mustér (Forum intercultural Mustér) ei vegnida fundada la fin digl onn 1999. La finamira: Tgirar il contact cun autras culturas e minoritads. Igl onn 2005 ha l’uniun organisau il seminari dall‘Uniun federalistica dallas minoritads etnicas dall‘Europa (FUEV). Ils onns suandonts ein ulteriurs arranschaments per minoritads vegni arranschai. Il forum ei lu era staus iniziant dall’Europeada 2008, il turnier da ballapei da minoritads linguisticas dall’Europa ch’ei vegnius organisaus silsuenter en autras tiaras. Ulteriurs arranschaments dil forum ein stai 2011 in’jamna culturala cun ina delegaziun dils Sorbs dalla Tiaratudestga, ils Gaelics dalla Scozia ed ils Fris dil nord ni lu era 2013 las Pastgas russas. 2013 e 2014 ein minoritads dall’Africa stadas el center dall’activitad dil forum e 2015 ha ina purschida portughésa procurau per in brat cultural da habitonts derivonts dil Portugal culs indigens. Plirs onns ei il forum era staus conorganisatur dil concert festiv per la fin digl onn dil dirigent Simon Camartin cun orchesters digl exteriur.

Ils 17 da mars 2023 ha il Forum intercultural Disentis/Mustér – sco el vegneva numnaus il davos – fusiunau cun La Culturella. La Culturella ei vegnida fundada ils 20 d’avrel 2011. Siu intent: Dar veta alla cultura indigena, mo era porscher ad indigens e hosps da vacanzas arranschaments da divertiment. Aschia ha La Culturella organisau en quels onns seras da divertiment denter auter cun Francine Jordi, Nina Burri, Acabellos, Acavoce, Marco Rima, Rolf Schmid, Flurin Caviezel, ils Furbazs ni era ils Cadets russ. Lu era differentas prelecziuns e concerts classics. Ils davos onns ei La Culturella stada conorganisatura dils concerts festivs per la fin digl onn cul dirigent Simon Camartin. A quels concerts ein mintgamai orchesters dall’Ucraina sco era solistas e solists stai d’udir.

Commembers

Las commembras ed ils commembers da La Culturella ein persunas che s’engaschan cun tgierp ed olma ell’organisaziun d’arranschaments da cultura e divertiment. Quei ei en special concerts, prelecziuns, referats, teaters ni era sentupadas cun autras culturas. La Culturella porscha la plattafuorma da sepresentar cun ina purschida d’informaziun e da cultura. Persunas che sesentan plidentadas dallas finamiars da La Culturella san bugen s’interessar tier ina commembra ni in commember da suprastonza ni emplenir ora il talun cheusut.